Pages

Showing posts with label ആത്മഗതം. Show all posts
Showing posts with label ആത്മഗതം. Show all posts

July 03, 2011

യാത്ര

നേര്‍ത്ത പനിയുമായ് പടിയിറക്കം... 
അമ്മയുടെ കണ്ണിലെ കാര്‍മേഘവും 
അച്ഛന്റെ കണ്ണിലെ കനലും 
പനിച്ചൂടില്‍ അറിഞ്ഞതേയില്ല.

കൂട്ടുകാര്‍ അവനെ  കാത്തിരുന്നപ്പോള്‍  
അവന്‍ രാത്രിവണ്ടിയെക്കാത്തിരുന്നു.
ദുശ്ശീലങ്ങള്‍ കൂട്ടുകാര്‍ക്ക് ശീലം, 
കാത്തിരിപ്പുകള്‍ അവസാനിക്കുന്നതങ്ങിനെ.

രാത്രിവണ്ടി ചൂടും വിയര്‍പ്പും ചൂരുമായി 
അവന്റെ അബോധം അതിജീവനത്തിനു കൂട്ടായി 
പനിച്ചൂടും സ്വപ്നങ്ങളും യാത്രയ്ക്ക് കൂട്ടായി 
യാത്രാവസാനം അവന്‍ അവളെ കണ്ടെത്തി 

അവള്‍ അവന്റെ രൂപം മാറി വരച്ചു, മനമില്ലാമനസ്സോടെ
അവന്‍ അവളെ ഉള്‍ക്കൊണ്ടു, പച്ചയായി 
അവന്‍ പറഞ്ഞുകൊണ്ടിരുന്നു,
വാക്കുകള്‍ കൈവിട്ടുപോകുമെന്ന പേടിയില്‍, 
അവള്‍ കേട്ടുകൊണ്ടിരുന്നു,
കേള്‍വിയും സ്വപ്നമാകുമെന്നോര്‍ത്ത്

രാത്രിവണ്ടിക്ക് യാത്ര പറയുമ്പോള്‍ 
നക്ഷത്രങ്ങള്‍ വിരിഞ്ഞ കണ്ണുകള്‍ യാത്രാനുമതി തന്നു.
ആലിംഗനത്തില്‍ പേടിയില്ലാതമരുമ്പോള്‍
പനിച്ചൂട് അവളെ പൊള്ളിച്ചത് അവന്‍ അറിഞ്ഞില്ല.

പ്രതീക്ഷയുടെ, വിരഹനൊമ്പരത്തിന്റെ പതിവ് കാഴ്ചയ്ക്ക് 
അയാള്‍ പിന്തിരിഞ്ഞു നോക്കിയില്ല.
അതായിരുന്നില്ല അവളുടെ മുഖത്തെന്ന്‍ 
അയാള്‍ അറിഞ്ഞതുമില്ല.

മടക്കയാത്രയില്‍ ഒന്നും അയാള്‍ അറിഞ്ഞില്ല.
രാത്രിവണ്ടിയുടെ വാതില്‍പടിയില്‍ നിന്നും 
പനിമനസ്സുമായി മരണത്തിലേക്കൂര്‍ന്നു പോകുമ്പോള്‍ 
അയാളുടെ മനസ്സ് കിനാക്കളില്‍ സുരക്ഷിതമായി ഉറങ്ങി.   
    

June 12, 2011

കൂട്ടുകാരന്‍

അവനെന്നോട് പറഞ്ഞു, 
നീയവിടെ പോകേണ്ട, 
ഞാന്‍ പോയിട്ട് വരാം.

ഞാന്‍ അവനോടു പറഞ്ഞു,
ഞാനവിടെ പോയി വന്നിട്ട് 
നിന്നെക്കൂടി കൂട്ടാം

അതിരാവിലെ ഞാന്‍ പുറപ്പെട്ടു 
അവിടെ വലിയൊരാള്‍ക്കൂട്ടം...

അവന്റെ  മരിച്ച ചുണ്ടില്‍ 
ഞാന്‍ കണ്ടത് 
എന്നെ തോല്‍പ്പിച്ച ചിരി, 
പിന്നെ എന്നോട് 
പറയാന്‍ കരുതിയ വാക്കുകളും....   

June 02, 2011

പ്രണയം....

ഏറ്റവും ഭീകരമായി ആത്മഹത്യ ചെയ്യുന്നതെങ്ങിനെ?
ഞാനെന്റെ കൂട്ടുകാരിയോട് ചോദിച്ചു.
പെണ്‍കുട്ടിയോട് ചോദിക്കാന്‍ പറ്റിയ വിഷയം,
അവള്‍ ചിരിച്ചു .

മനസ്സില്‍ കൊരുക്കുന്ന ചിന്തകള്‍,
എന്റെ സ്വകാര്യ ദുഃഖം.
ചുട്ടു പഴുത്ത പ്രതലത്തില്‍ മുഖം ചേര്‍ക്കുമ്പോള്‍ 
അവരുടെ മനസ്സില്‍ എന്തായിരുന്നിരിക്കണം ?
എനിക്കന്നുറങ്ങാന്‍ കഴിഞ്ഞില്ല.
ശരീരവേദനകള്‍  അറിയിക്കാതെ 
പ്രണയം പഠിപ്പിച്ചു ചിലത് .
പ്രണയം കൈവിട്ടു പോയപ്പോള്‍
വേദനകള്‍ ആശ്വാസമായി,
വേദനകള്‍ തിരിച്ചറിവുകളായപ്പോള്‍ 
പ്രണയം പടിയിറങ്ങി പോയി...

പ്രണയം തിരിച്ചു വരുന്ന നാള്‍ തേടി
ജീവിതത്തിന്റെ കണക്കുപുസ്തകവും തുറന്ന്‍ 
ഞാന്‍ കാത്തിരിക്കുന്നു...
കുറെ കണക്കുകള്‍ കൂട്ടാനുണ്ട് ,
കുറെ കണക്കുകള്‍ തീര്‍ക്കാനും...

May 25, 2011

ആത്മഹത്യ ചെയ്യാന്‍ മതിയായ കാരണങ്ങള്‍


പിറന്നു വീണപ്പോള്‍ 
അമ്മ മുലപ്പാല്‍ നല്‍കാതെ ഉറങ്ങിയതിന് ,
മൂന്നു വയസ്സുള്ളപ്പോള്‍ 
അച്ഛന്‍ അനിയന് മാത്രം കളിപ്പാട്ടം വാങ്ങിയതിന് ,  
നാലാം ക്ളാസ്സില്‍ 
വെള്ളത്തിലിറങ്ങിയതിനു   ടീച്ചര്‍ വഴക്കുപറഞ്ഞതിന് , 
ഏഴാം ക്ളാസ്സില്‍ 
കൂട്ടുകാരന്‍ സ്കൂള്‍ മാറി പോയതിന് ,
പത്താം ക്ളാസ്സില്‍ 
ടി വി യില്‍ കളി കാണാന്‍ അനുവദിക്കാതിരുന്നതിന് , 
പന്ത്രണ്ടാം ക്ളാസ്സില്‍
അവള്‍ക്കു നല്‍കിയ പ്രേമലേഖനം 
കൂട്ടുകാരികളെ വായിച്ചു കേള്‍പ്പിച്ചു ചിരിച്ചതിന്, 
കോളേജില്‍ 
സ്നേഹിച്ച പെണ്‍കുട്ടി ടൂര്‍ പോയ കഥകള്‍ 
കൂട്ടുകാര്‍ പറഞ്ഞറിഞ്ഞതിന് ,  
യൌവ്വനത്തില്‍  
ഭാര്യ അയല്‍ക്കാരനോട് 
തമാശ  പറഞ്ഞു ചിരിച്ചതിന്, 
മധ്യവയസ്സില്‍ 
ജോലിയില്‍ നീതി പുലര്‍ത്തിയിട്ടും 
കള്ളക്കേസില്‍ കുടുക്കിയതിന്,
അറുപതാം വയസ്സില്‍ 
ഷഷ്ടിപൂര്‍ത്തിക്ക്   മക്കള്‍ വരാത്തതിന്, 
എഴുപത്തഞ്ചാം വയസ്സില്‍ 
വെറും വെറുതെ ബോറടിച്ചിട്ട് ,    
എന്നിട്ടും കാരണമില്ലാതെ എന്തിനോ എത്രയോ..................    

May 24, 2011

കവിത പാട്ടാകുന്നതെപ്പോള്‍

അന്യന്റെ സ്വപ്നങ്ങള്‍ തേടി അലയുമ്പോള്‍
എന്റെ സ്വപ്നങ്ങള്‍ പടിയിറങ്ങി പോകുമ്പോള്‍
മഷി പടര്‍ന്ന കാമം പ്രണയത്തില്‍ തെളിയുമ്പോള്‍ 
അലന്കാരങ്ങള്‍  മുഖം മറയ്ക്കുമ്പോള്‍

വെറുപ്പിന്റെ ശീലുകള്‍ കവിതയില്‍ തടയുമ്പോള്‍
അധിനിവേശം അവകാശമാകുമ്പോള്‍ 
ജീവിതത്തിന്റെ ചവര്‍പ്പില്ലാത്ത വിയര്‍പ്പുകണങ്ങള്‍
കോറിയിട്ട വരികളില്‍ തിളങ്ങുമ്പോള്‍

മനസ്സില്‍ വരച്ച  ചിത്രം
വാക്കുകളില്‍ പകര്‍ത്താനാവാതെ വിഷമിക്കുമ്പോള്‍
താളം മുറുകുമ്പോള്‍ , സംഗീതം , നിറയുമ്പോള്‍
ഞാനീ  പാട്ട് പുസ്തകം നിങ്ങള്‍ക്കായി തുറക്കുമ്പോള്‍ ‍.

May 20, 2011

ഞാന്‍

അച്ഛന്‍ പറഞ്ഞു
എന്‍റെ തലമുറ
അന്യം നില്‍ക്കാതെ കാക്കേണ്ടവന്‍ നീ.
പാരമ്പര്യത്തിന്‍റെ ഗുണദോഷങ്ങള്‍
എല്ലാ കണ്ണികളിലും കാണില്ലെന്ന്
അച്ഛനറിയില്ലായിരുന്നു

അമ്മ പറഞ്ഞു,
നീ അനുസരണയില്ലാത്തവന്‍
അനുസരിച്ചതൊന്നും
അമ്മ ഓര്‍ത്തിരുന്നില്ല.

കാമുകി പറഞ്ഞു,
നീ നല്ലവന്‍
മോശമാവാന്‍ ധൈര്യമില്ലാത്തതുകൊണ്ടാണെന്ന്
അവളറിഞ്ഞില്ല.

പിന്നെ ഭാര്യ,
എന്‍റെ വിശാലമാം ലോകം
അവള്‍ക്കാദ്യം കൗതുകം
പുതുമയൊടുങ്ങിയപ്പോള്‍ നിരാശ
ഏകാന്തതയറിഞ്ഞപ്പോള്‍ ഭയം
ഒടുവില്‍ വീര്‍പ്പുമുട്ടല്‍
ഇപ്പോള്‍ ശീലം

മകന്‍,
പാരമ്പര്യത്തേക്കാള്‍
പാരമ്പര്യരോഗങ്ങളെക്കുറിച്ച്
അന്വേഷിക്കുന്നവന്‍
അവന്‍റെ ചോദ്യങ്ങളെ
സമാധാനങ്ങള്‍ പറഞ്ഞും
പ്രാര്‍ഥനകള്‍ കൊണ്ടും
ഞാന്‍ മറികടക്കുന്നു

ഞാന്‍
അറിവുകളെ ഭയക്കുന്ന,
തിരിച്ചറിവുകളില്‍ വേദനിക്കുന്ന,
തിരുത്തലുകളില്‍ പരാജയപ്പെട്ട,

ജീവിതത്തിന്‍റെ പാഠപുസ്തകം 

May 11, 2011

കാത്തിരിപ്പ്

ഞാന്‍ മഴയെ കാത്തിരുന്നു 
മേഘങ്ങള്‍ പറന്നു പോയി...ഞാന്‍ അറിഞ്ഞില്ല
ഞാന്‍ മഞ്ഞിനെ കാത്തിരുന്നു.
തണുത്തത് മഞ്ഞു വീണ് ആയിരുന്നോ ഞാന്‍ അറിഞ്ഞില്ല
പൊഴിയുന്ന ഇലകള്‍ എന്നെത്തേടി വരുമെന്ന് കരുതി
അവ എവിടേക്കോ പറന്നുപോയി  
ഋതുക്കള്‍ മാറിക്കൊണ്ടിരുന്നു. ഒന്നും എന്നിലെത്തിയില്ല
ജീവിതം തന്നെ കാത്തിരിപ്പാകുമ്പോള്‍ ഞാന്‍ നിസ്സഹായനാകുന്നു..


May 01, 2011

മങ്ങിയ കാഴ്ചകള്‍

കാഴ്ചയുടെ കണക്കു പുസ്തകം തുറന്നു ഞാനിരിക്കുന്നു 
മങ്ങിയ കാഴ്ചകള്‍ മറയുന്നതും നോക്കി 
വാക്കുകള്‍ രൂപങ്ങള്‍ സൃഷ്ട്ടിച്ചു കടന്നു പോകുന്നു കാഴ്ചയുടെ 
കാഴ്ച മങ്ങുമ്പോള്‍ രൂപങ്ങള്‍ക്ക്‌ ഭാവവും നഷ്ടപ്പെടുന്നു..

സ്നേഹത്തിന്റെ പുസ്തകം

നീയെഴുതിയ സ്നേഹത്തിന്റെ പുസ്തകം ഞാനിന്നാണ് കാണുന്നത് 
വാക്കുകളിലെ കനലുകള്‍ കാരണം എനിക്കവ സ്പര്‍ശിക്കാന്‍ കഴിയുന്നില്ല 
ആത്മകഥ അജ്ഞാതന് സമര്‍പ്പിച്ച സങ്കടം ബാക്കി 
ബാധ്യതയുടെ കണക്കുകള്‍ നിനക്കെന്നും തെറ്റുന്നതെന്തേ?
സ്വപ്നങ്ങള്‍ കരഞ്ഞു തീര്‍ക്കാന്‍ കനലുകളുടെ ചൂടെന്തിന് കൂട്ടായി വേണം? 

January 28, 2011

ഇന്നത്തെ ലോകം

ഇന്നത്തെ ലോകം എന്റെ സങ്കടങ്ങളിലൂടെ എന്നെ കടന്നു മുന്നോട്ടു പോകുന്നു.മറ്റുള്ളവരെ സ്നേഹിക്കാന്‍ ശ്രമിക്കുമ്പോഴും നന്മകള്‍ മറ്റുള്ളവര്‍ക്കായി സൂക്ഷിക്കാന്‍ ശ്രമിക്കുമ്പോഴും ജീവിതം തരുന്ന പാഠങ്ങള്‍ സഹനത്തിന് കരുത്തുകൂട്ടാന്‍ മാത്രം ശേഷിക്കുന്നു. നെറിവിന്റെ നേരിന്റെ വെള്ളി വെളിച്ചം പ്രചോദനമായി, പ്രാര്‍ഥനകള്‍ കരുത്തേകി  ജീവിതം പിന്നെയും ബാക്കിയാകുന്നു.

October 25, 2010

യാത്ര

പ്രണയത്തിനും ജീവിതത്തിനുമിടയില്‍ ഞാനെന്നെ തേടുന്നു.
നീ മുന്നേ പറന്നുപോയ പക്ഷി. 
ഞാന്‍ ദിശയറിയാത്ത പറക്കാന്‍ മറന്ന ജന്മം
എങ്കിലും എന്തൊക്കെയോ ശേഷിക്കുന്നു.
കാറ്റില്‍ നിഴലുകള്‍ ഇഴയുന്നു.
താവളം അകലെയെങ്ങോ?
ഒഴുക്കില്‍ എന്നെത്തേടി വന്നത്
എന്നെ കടന്നു പോയത് ഞാന്‍ അറിഞ്ഞില്ല.
മഷിപ്പാടുകള്‍ മാഞ്ഞു പോയി .
മുറിപ്പാടുകള്‍ മാത്രം വിങ്ങുന്നു.
യാത്ര തുടരുന്നു. നിര്‍ത്താനാവുന്നില്ല.
അകലെയെങ്ങോ അവസാനമുണ്ട്.

August 22, 2010

നിനക്കായി


മനസ്സില്‍  നിറയുന്ന പ്രണയം
നെഞ്ചോട്‌ ചേര്‍ന്നിരിക്കുമ്പോള്‍ പിടയുന്ന മനസ്സ്‌.
മനസ്സില്‍ കൂട് കൂട്ടാനും കൂട് പൊട്ടിച്ചു പറക്കാനും..
എന്റെ ലോകം നിനക്ക് മതിയാകുമോ?
ചേര്‍ത്ത് വയ്ക്കുമ്പോള്‍ അകലാനും  
അകലുമ്പോള്‍ മടങ്ങി വരാനും  ഇനിയെത്ര കാലം.
ഉരുകിയും അലിഞ്ഞും ജീവിതം അവസാനത്തിലേക്ക്‌.
ഉരുകുമ്പോഴും ഈ മങ്ങിയ വെളിച്ചം നിന്റെ വഴികളില്‍
കാലിടരാതിരിക്കാന്‍ ഞാന്‍ കരുതി വയ്ക്കുന്നു.

August 21, 2010

പ്രണയം

എന്റെ പ്രണയം നീറുന്ന ചൂടും 
പൊള്ളുന്ന തണുപ്പുമായി 
എന്നില്‍ നിറയുന്നു...............!!!!!!!!!!!

August 03, 2010

സൗഹൃദം

സുഹൃത്തുക്കള്‍ എന്നും എന്റെ ബലഹീനതയായിരുന്നു.
കൊണ്ടും കൊടുത്തും കണ്ടും കരഞ്ഞും കടന്നുപോയ ഒരു കാലം
കാലം തന്ന മുറിവുകള്‍ കൂടി തിരിച്ചറിയാത്തത്ര മാറിയിരിക്കുന്നു എല്ലാം
ഇനി എന്നാണിതൊക്കെ ഒന്ന് വാരിക്കൂട്ടിയെടുക്കാന്‍ കഴിയുക?
മരണത്തില്‍ നിന്നും ജനനത്തിലേക്ക് ജീവിക്കുവാന്‍ കഴിഞ്ഞിരുന്നെങ്കില്‍ ....
തിരുത്താന്‍ പറ്റാത്തവയെ തിരിച്ചറിയാനെങ്കിലും കഴിഞ്ഞിരുന്നെങ്കില്‍ ...

July 21, 2010

ജീവിതം

ജീവിതം പിന്നെ പിന്നെ ഇങ്ങനെയൊക്കെയാണ്

July 20, 2010

സ്വാഗതം

സ്വയം നന്നാവാതെ മറ്റുള്ളവരെ കുറ്റപ്പെടുത്തി ഞാന്‍ മഹാനാണെന്ന് കരുതി അഹങ്കരിക്കുന്ന എല്ലാ മലയാളിക്കും എന്റെ ബ്ലോഗിലേക്ക് സ്വാഗതം !

July 19, 2010

എന്റെ ലോകം

എന്റെ ലോകത്തേക്ക് ഹാര്‍ദവമായ സ്വാഗതം